كندا حنا لرشا شربتجي: لما بدي عبر عن محبتي بحكي حقيقة الموقف

بوسطة – متابعة

ردت الفنانة كندا حنا على الكلام الذي قالته المخرجة رشا شربتجي حول سبب الخلاف بينهما ببرنامج “شو القصة” على قناة “لنا”.

وكانت رشا قد تحدثت أن سبب الخلاف توجيهها كلاماً بنبرة قاسية بعض الشيء لكندا أثناء تصوير أحد مشاهد مسلسل “وش رجعك” (قصة محمد سعيد الضنحاني، سيناريو وحوار رياض نعسان آغا) عام 2014، إذ كانت حنا تمسك جوالها، وأضافت شربتجي أن حنا صرحت على إثر هذا الأمر في ما بعد أنها لن تعمل مجدداً معها.

كلام رشا الأخير دفع كندا للرد عليها بتسجيل صوتي قالت فيه “هي بدأت بالجواب انو هي لا تعلم سبب التصريح، أولاً هي تعرف لأن بعد ما قررت صرح اتصلت فيها اسألها إذا عندا مشكلة بهالشي فقالتلي عملي يلي يريحك”، وأضافت أن المشكلة ليست كما شرحتها رشا “هي ما بيصير تقول انو ما بتعرف اني كنت حامل لأنها كانت بتعرف”.

وتحدثت حنا عن المشكلة من وجهة نظرها، مبينة أنها تحملت الكثير من عدم التنظيم أثناء تصوير العمل، فرغم حملها ومرضها حجزت الطيران بنفسها لأنها طلبت من مدير الإنتاج رضا خباز أكثر من مرة أن يقوم بذلك “مرة يقلي ما حجزت ومرة يقلي ما لقيت”، وتابعت بوصفه “هو أبداً مانو شخص مهني بالعمل وكان عم يعذب الكل”.

لتكمل “فاتت رشا بقلب اللوكيشن ودافعت عن كذبة رضا خباز واتهمتني إنو عم اتهكم عليه وكذبو قدام العالم، بلحظتا أنا ما رديت بس غصيت ودموعي كانت ما عم تهدا”، موضحةً أنها رغم ذلك لم ترد وواصلت عملها وخرجت مع كادر العمل للبحث عن موقع تصوير آخر، وفي هذه الأثناء “طلبت من الإنتاج سندويشة لأن بدي آكل لآخد دوا مر 3 ساعات وما جابوا، فبقلب الأوردر قلتلن حدا يعطيني سندويشة هون رشا قالت: “ستوب عشان كندا عايزة تاكل يلا كلنا نستناكي”، واستمرت بعدها عمليات التصوير بوجود مشاحنات بين الطرفين.

هذا الموقف دفع حنا للاعتذار عن مشاركة رشا بأي عمل آخر “بعد ما ودعتا وطلعت بالسيارة بعتتلا لرشا مسج لأن ما كنت قدرانة قلا ياها لايف، كتبتلا أنا بعتذر، أنا وياكي بالحياة كتير رح نكون بس قدام كاميرتك معد فيني وقف”.

ولم تقف عند هذه النقطة من كلام شربتجي في “شو القصة، وتابعت “هي ما بيصير تقول مشكلة موبايل، أنا باللوكيشن كنت قاعدة على جنب وفتلت الممثلة لعندك لتتناقشوا بالحوار اللي لازم هي تقولو، بهاللحظة أنا مسكت موبايلي لأن النقاش مالي فيه”، وقالت إنها رغم سوء التنظيم كانت ملتزمة “بالوقت يلي أنا بفيق الساعة 5 الصبح لأعمل شعري ومكياجي وكون الساعة 7 بالأوردر ظل ناطرة الممثلة للساعة 10 لتخلص شعرها ومكياجها وأنا ساكتة وملتزمة، لهيك انتي ما بيصير تقولي انو المشكلة سببا ممثل أو ممثلة”.

وعن كلام رشا بأنها دعتها للعمل بسبب اشتياقها وحبها لها ردت أيضاً “لما انتي بتجيبيني ع يوم ممطر آخر مو لأن أنا بعرفك، لأنك سمعتي انو في بنت منيحة طالعة وعم تشتغل حلو فانتي جبتيني عملتي تيست وعطيتيني وهاد مشكورة عليه”، وأضافت أنها ليست بحاجة للعلاقات لتثبت وجودها حيث عملت مع الكثير من المخرجين الذين أحبوها وقدموا لها الدعم.

وحتى ما قالته شربتجي عن زيارة كندا حنا لها، وطريقة التعامل بينهما في أثناء العمل وإحساسها بأن كندا ابنتها حيث تقول لها “ماميتي”، لم يفلت من رد الأخيرة “أنا زرتك لأن انتي عزمتيني ع بيتك، فحتى هي المعلومة إجت من باب طلب منك انو زورك فزرتك”، وتابعت “كلمة ماميتي إذا كانت حاسة إني عم عبرلا عهنا فشكراً إلها، ما بدي احكي بالأمور العاطفية وخدش بإحساسا تجاهي، ما مهم أصلاً اذا كنت قلا ماميتي أو لا، اذا هي هيك حاسة هاد شي ايجابي بالنسبة الي”.

وأبدت حنا استعدادها لمواجهة رشا بحقيقة الموقف قائلة إن كلامها لم يكن حقيقياً “لما بدي عبر عن حالي وعن محبتي بعبر صح أو بحكي حقيقة الموقف، لو عملت هيك يمكن كانت الناس عذرتا وما اضطرتني اطلع بوجه اني عم رد عليها”، وأضافت في نهاية الحديث “مو مهم على مين الحق المهم انو نطلع نعبر عن حالنا ونحكي الموقف متل ما صار”.

عن admin1

شاهد أيضاً

لم يُخطئ من شبّه “الهيبة” بـ “باب الحارة”

بوسطة- متابعة على مدار 9 أجزاء من مسلسل “باب الحارة” اشتهر العمل أنه “المسلسل الذي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *